Giòbia 7 de abrile 2022 a sas 4 e mesa (h 16,30) in su Tzentru Servìtzios Culturales UNLA de Aristanis s’at a fàghere su seminàriu “Cagliade·bos creaturas, lassade piànghere a mie”, seminàriu a cura de Marcello Marras chi tratat de sos ritos, sonos, càntigos e traditziones de sa Chida Santa in Sardigna.
Sa Chida Santa est unu de sos momentos prus fortes in sa vida de sas comunidades sardas: dae sa Domìniga de Prama a sa Domìniga de Pasca benint ammentados sos momentos prus significativos de sa passione e morte de Gesùs. In prus de sos ritos litùrgicos propostos dae sa Crèsia, in Chida Santa paritzas biddas tenent ritos e traditziones tìpicas.
In su seminàriu “Cagliade·bos creaturas, lassade pianghere a mie”, Marcello Marras at a presentare ischedas audiovisivas e nd’at a faeddare cun sos dischentes pro pònnere in evidèntzia caraterìsticas e particularidades de sa Chida Santa in sas biddas sardas.
Marcello Marras, diretore de su Tzentru Servìtzios UNLA de Aristanis, dae su 2007 a su 2014 est istadu dotzente de "Etnocoreografia de Sardigna" e de "Laboratòriu e istùdiu de sa mùsica sarda" in su cursu de Etnomusicologia de su Cunservatòriu istatale de mùsica “G.P. da Palestrina” de Casteddu. Dae prus de trintaghimbe annos est faghende chircas in contu de sa mùsica e de sas festas sardas.
(GF.P.)
