S'Assòtziu Culturali “Casa Natale Antonio Gramsci” de Abas at publicau, in ocasioni de is 133 annus passaus de candu est nàsciu su Statista, est a nai su 22 de gennàrgiu, su bandu de cuncursu de su Prèmiu Literàriu dedicau a Antoni Gramsci. Su cuncursu est abertu a totus e est partziu in ses setzionis:
-
Poesia in Lìngua sarda mai imprentada – a tema lìberu
-
Poesia in Lìngua italiana mai imprentada – a tema lìberu
-
Contu in Lìngua sarda mai imprentau – a tema lìberu
-
Romanzu o ragorta de contus in Lìngua italiana mai imprentaus – a tema lìberu
-
Sagìstica mai imprentada – a tema gramscianu
-
Fumetu mai imprentau – a tema gramscianu
S'autori/a podit pigai parti a prus de una setzioni, bastit chi is traballus, unu a cadauna setzioni, non ddus apant giai premiaus in àterus cuncursus.
Po sa setzioni de Sagìstica s'ammitint òperas o tesis de làurea scritas in àteras lìnguas comunitàrias bastit chi siant acumpangiadas de sa tradutzioni in lìngua italiana.
Totu is òperas si depint mandai cun mezu digitali (CD, DVD, pinnixedda USB), sarvu cussa chi pertocat sa setzioni 2 Poesia in Lìngua italiana, ca tocat de nci dda mandai a paperi a tres còpias. Is traballus si depint ponni in busta serrada e mandaus a s'Assòtziu culturali “Casa Natale Antonio Gramsci” de Abas aintru e sena de sartai su 15 de cabudanni de su 2024.
Sa giuria at a premiai un'òpera a cadauna setzioni e at a podi detzidi àterus prèmius o arreconnoscimentus.
Sa tzerimònia de premiatzioni s'at a fai ocannu chi benit, su 22 de gennàrgiu de su 2025 in ocasioni de s'anniversàriu de nàscida.
Po ndi sciri de prus ligi totu su regulamentu in su giassu de s'Assòtziu.
