Su Coru polifònicu “Sant'Austinu” impari e cun su patrocìniu de su Comunu de Alà at bandiu unu cuncursu de poesia in lìngua sarda chi si tzèrriat “Damus boghe a sa limba sarda”.
Su cuncursu est abertu a totus is sardus, de nàscida e/o de residèntzia o emigraus in cali si siat parti de su mundu.
A su cuncursu si podit pigai parti cun una poesia sceti, mai imprentada prima e mai premiada o publicada in cali si siat forma.
Sa poesia est a tema lìberu stèrria in lìngua sarda e scrita, chi fait, in LSC.
Ma fait a dda scriri in in cali si siat àtera variedadi de is lìnguas de Sardigna: gadduresu, tataresu o in cadalanu e tabarchinu bastit chi siat acumpangiada, po custas duas lìnguas, de tradutzioni in lìngua italiana.
Po podi pigai parti a su cuncursu tocat a intregai, in prus de sa poesia, sa scheda de iscritzioni, una fotocòpia de documentu de reconnoscimentu e còpia de su regulamentu firmau.
Totu is documentus si podint intregai a manu o mandai a posta a arracumandada A/R a s'ufìtziu protocollu de su Comunu de Alà aintru de su 31 de su mesi de ladàmini de su 2024, at a balli po custu su timbru postali.
Is poesias ddas at a giudicai una giuria aposta tenendi contu de su lèssicu, sa forma, sa calidadi, su balori de su chi si scriit, de is emotzionis e musicalidadis chi ndi bessint.
Su traballu prus bellu s'at a premiai a dinai cun unu prèmiu de €600 e in prus, sa poesia at a essi su testu de sa cumpositzioni de su branu chi at a fai su diretori artìsticu de su Coru polifònicu Sant'Austinu chi s'at a pigai s'incàrrigu de dda cantai in totu is ocasionis de importu. S'ant a arreconnosci arremonis specialis intituladas a Mariolino Corda e Tonino Gaias de 150 èurus cadauna, mentras at a arriciri su prèmiu “Barore Nieddu” sa poesia scrita de unu nàsciu o residendi o fillu de alaesus.
Po ndi sciri de prus ligi su regulamentu de su cuncursu.
