Cun sa punna de spaniai e favoressi sa cultura sarda e de arregordai unu cuntzitadinu, poesta e improvisadori, su Museu “Casa Deriu” cun su patrocìniu de su Comunu de Tresnuraghes ant publicau su prèmiu de poesia in lìngua sarda “Sebastiano Moretti”.
Su prèmiu est partziu in tres setzionis:
1- setzioni in rima, abertu a totu is poetas chi intregant un'òpera in rima e in lìngua sarda sena de sartai 40 versus;
2- setzioni a versu lìberu,abertu a totu is poetas chi intregant un'òpera in versu lìberu e in lìngua sarda sena de sartai 40 versus;
3- setzioni speciali “Su trintasete”, abertu a totu is poetas chi intregant unu cumponimentu sighendi su “trintasete”, “retrogadu”, “fioridu” e “tent' a maglia” chi at imbentau su poeta Sebastiano Moretti.
S'amitint a su prèmiu totu is poesias scritas in lìngua sarda. Po cussas scritas in gadduresu, cadalanu e tabarchinu serbit finas sa tradutzioni in lìngua italiana mentras est agradèssia sa tradutzioni de cussus fueddus o espressadas pagu connotas de sa lìngua sarda.
Is poesias depint essi nobas e mai imprentadas o premiadas in àterus cuncursus o publicadas in cali si siat logu.
Po podi pigai parti a su cuncursu non si pagat nudda.
Is traballus si depint intregai a su Comunu de Tresnuraghes aintru de su 31 de su mesi de austu de su 2024.
A is primus tres arribaus de cadauna setzioni s'ant a donai targas e arreconnoscimentus, non s'ant a donai prèmius a dinai.
Po ndi sciri de prus bai a su giassu istitutzionali de su Comunu de Tresnuraghes o telèfona a su nùmeru 3333769368.
