Torrat ocannu puru sa Sagra de s’aranada in Masuddas chi at cuncordau sa Pro Loco de Masuddas a manu de pari cun is Assòtziu de sa bidda e su contributu de su Comunu de Masuddas.
Sa sagra arruit in ocasioni de sa festa de Santu Leonardu e fait connosci una fruta chi crescit meda in su logu.
Sa sagra dda faint sàbudu 2 de onniasantu e inghitzat a is tres de meigama cun is saludus de is autoridadis e s’abertura de totu is mesas.
S’ant a fai connosci licoris e durcis fatus de aranada, e a chini bolit ddus podit comporai puru.
In s’interis me in is bias de sa bidda ant a baddai, a sonu de sonetu de Walter Atzori, su grupu folclorìsticu Pro Loco de Masuddas e su grupu folclorìsticu “Su Sticcau” de Mòguru.
A is cuàturu s’Assòtziu AUSER Masuddas at a ammostai is giogus antigus de is pipius in pratza de Itàlia.
A is cincu nci at a ai una garixedda a arrepentina e muteus (traballu chi ant cuncordau gràtzias a su progetu de tutela de sa lìngua sarda Tu.Li.S. 2023).
A is ses totus a baddai in pratza de Santu Leonardu.
No ant a amancai mesas po bendi sa cena e àtera cosa de papai e bufai.
A is 9 oras de merii mùsica cun is “Pover bend Pomegranate live tour 2024” in pratza de Santu Leonardu.
In ocasioni de sa sagra is abisitadoris ndi ant a podi aprofitai po castiai sa bidda e su Parcu de sa pedra crobina (ma tocat de s’allistai in antis) e is Museus (GeoMuseo Monte Arci, I Cavalieri delle colline).
