Sa cota de su pani est unu traballu de importu in sa traditzioni sarda, agiomai unu rituali chi tocat finas s’àmbitu culturali e religiosu.
No ammancat in sa mesa e acumpàngiat is diis prus bellas de sa vida nosta, movendi de su batiari finas a sa coja innui su pani tenit ocasioni de pigai bisura de prenda de comenti est pintau beni.
In passau fiant is fèminas, is meris de domu, a ddu fai, una borta a sa cida, e ddu inforrànt in forrus de linna chi agiomai totus teniant in domu.
Oindii funt pagus is chi sighint a ddu fai in domu, fatu oramai in logu de forru de paneteris po su prus a forru elètricu.
In provìntzia funt unas cantu biddas chi sighint sa traditzioni, tantu de ndi fai sagras, in custu mesi est tocau a Pompu (domigu 20 de ladàmini) cun “Fromentu”, sagra de su pani e de su trigu, e custa coa de cida, su 25, 26 e 27, tocat a Biddobrana cun “Le Vie dei Forni”, sagra de su pani.
Cenàbura a merii aberrint totu is mesas anca si podit tastai cosa de papai e bufai e dd’ant a sighiri sàbudu e domigu puru.
Su programma ponit in contu giogus, mùsica e baddus sardus, cosa de papai e de bufai a tastai e a bendi e, mancu nau si bolit, s’at a ammostai a sa genti comenti si fait e si pintat su pani. Nci ant a essi finas is paneteris de Genzano, Altamura e Bordeaux. Ocasioni custa po tastai su pani siat sardu che continentali.
