Su Comunu de Siamajore, cun s’agiudu de sa R.A.S., Fundatzioni “Sardegna”, s’Assòtziu Entis Localis po is Atividadis Culturalis e de Spetàculu, s’Unioni de is Comunus de is Fenìciu, at cuncordau e publicau su programma de sa de 29 editzionis de sa Festa de sa Canciofa chi s’at a fai su 16 e su 17 de custu mesi, est a nai custa coa de cida.
Sa festa at a inghitzai sàbudu movendi de is 4 de merii cun unu cunvènniu asuba de sa bèndida de sa canciofa, anca ddui ant a pigai parti impresas, assòtzius e istitutzionis. In s’interis, me in is bias e pratza de sa bidda, nci ant essi is produtoris localis chi ant a bendi, ammostai e fai tastai is produtus insoru. A is 9 oras de merii in Pratza de s’asilu nci at a ai mùsica cun su grupu “Vasco Rossi tribute band”.
A s’incras, movendi de is 10 de mangianu, is abisitadoris, in prus de is mesas de is produtoris, ant a podi papai mandiari cun canciofa chi at a fai su coxineri Renzo. Movendi de is 4 de merii nci at a essi su spetàculu de baddus de sa traditzioni “A cumone”, sa premiatzioni de unu cuncursu de fotografia, unu spetàculu cun is “Seuinstreetband” e po acabbai, a is 9 oras in Pratza de s’asilu su cuncertu de “Is Janas”.
Sa canciofa est prantada meda in su sartu de Siamajore.
