Sant’Antoni, in su sètiu chi dda connosceus oi, mancai totu su sartu acanta fessit biviu giai in sa preistòria, est una bidda noba a cunfrontu de totu is àteras biddas acanta.
Contat Vitòriu Angius in su ditzionàriu geogràficu e stòricu suu, ca sa bidda iat pigau su nòmini de “S’Antonio de Funtana Coberta” po mori de Baressesus chi, sendi in cussu sartu fadendi linna, iant aciapau una stàtua de Sant’Antoni de su Fogu acanta de una mitza. De insaras is baressesus, e non, fiant abarraus innia pesendi-ndi is domus po ddui bivi e pesendi-ndi, in su 1702, un’oratòriu e in fatu sa crèsia in onori de su Santu.
Pagu apustis, su 9 de làmpadas de su 1720 cun àutu notarili sa bidda iat otentu s’arreconnoscimentu feudali, in 22 artìculus iant postu a craru is làcanas suas, is tributus chi depiant pagai is chi teniant bestiàmini, is benefìcius po sa crèsia noba de Santu Antoni de su Fogu, is permissus po piscai, po bendi, sa mesura e su nùmeru de domus de ndi pesai e àteru. Sa bidda iat pigau su nòmini de “Villa di Sant’Antonio de Funtana Coberta” e dda iant posta intra de is biddas de sa Baronia de Senis.
Su Lìburu cronistòricu de predi Rafieli Sedda ammostat beni meda totu is bortas chi ant mudau su nòmini a sa bidda.
A primìtziu, movendi de su 1724 sa bidda dd’arremonat cun su nòmini “S.Antonio” tzerriendi-dda in su pròpiu annu “Villanova S.Antonio Funtana Coberta” finas a su 1726, de insaras finas a su 1812 torra “S.Antonio”.
Movendi de su mesi de austu de su 1812 e finas a su 1818 pigat su nòmini de “Villanova S.Antonio” de inguni a innantis finas a su 1828 a simanas est arremonada comenti a “S.Antonio” e a simanas comenti a “Villanova S.Antonio”.
Me in àutus afatantis (1836 e 1840) est annotada cun su nòmini curtzu de “S.Antonio”.
In su 1849 Vitòriu Angius in su ditzionàriu geogràficu e stòricu suu ddu arremonat “S.Antonio o Villanova S.Antonio”.
In su 1861, spaciada sa baronia de Senis, sa bidda iat mudau nòmini in “S.Antonio Ruinas”, po ddu scerai de àteras biddas a nòmini sìmbili (S.Antonio di Santadi e S.Antonio di Gallura).
In su 1928 candu su Rennu de Itàlia iat acorpau a pari una surra de biddas, “S.Antonio Ruinas” iat pèrdiu s’autonomia diventendi fratzioni de su Comunu de Arruinas, torrendi-dda a teni me in is annus ‘50.
Sa bidda iat apoderau su pròpiu nòmini finas a is annus ‘80 candu, siat po unu sentidu de autonomia finas in su nòmini e siat po malintèndidas postalis iant fatu peditzioni po cambiai nòmini.
Cun Lei regionali n.16 de su 24 de su mesi de argiolas de su 1985 sa bidda pigat a manera ufitziali su nòmini de “Villa Sant’Antonio”.
Cun delìbera n. 31 de su 24 de austu de su 2010 de su Contzillu Comunali de aprovatzioni de su topònimu ufitziali de sa bidda in lìngua sarda si decidit su nòmini “Sant’Antoni” o “Sant’Antoi”.
