S'arrosu de Sardigna est unu produtu agroalimentari traditzionali de Sardigna e est prantau in su territòriu de Campidanu de Aristanis.
Apustis de ai tentau in passau de ddu seminai, sa primu curtura de arrosu in Sardigna dda iant fata in su 1927 candu a manera sperimentali ddu iant prantau me in is terras de sa bonìfica de Sassu (Arborea) po acoitai su processu de lisciviatzioni. In fatu sa curtura dda iant stèrria in totu su stàini de Sassu e acabbadas is bonìficas ddu iant sighiu a seminai a fùrriu de Aristanis, Prammas, Crabas, Simaxis.
In custu ambienti fait a prantai variedadis de tipu aromàticu, innui spicant totu is caraterìsticas organolèticas de is variedadis.
Su clima de custu logu permitit de seminai totu is variedadis in cummèrciu movendi de cussas cabudàrgias finas a cussas trigadinas de arragolli in atòngiu prenu.
In beranu apustis de ai arau is terras e de ddas ai aparixadas si prenint de àcua e si sèminant.
S'abisòngiu de àcua est acuntentau gràtzias a su frùmini Tirsu, chi in mesu a totu est arrica de podàssiu chi fait scerai mellus is caraterìsticas de calidadi de s'arrosu prantau.
In su mesi de maju s'arrosu inghitzat a intzeurrai e a bellu a bellu a cresci, a fai sa spiga e a cumpriri finas a lompi a s'arragorta chi si fait in atòngiu messendi-ddu a màchina.
Apustis de dd'ai prugau, bogau de sa camisedda, sciacuau e sbiancau est bellu a coi e a papai.
S'arrosu sardu, mancai non siat meda, est apretziau finas a essi unu de is mellus a su mundu.
In prus su ENR (chi est s'Enti Natzionali de s'Arrosu) reconnoscit a sa regioni nosta sa mellus po sa produtzioni de arrosu de sèmina, sendi ca tenit una percentuali de intzeurrai de su 92-94% prus arta de sa norma chi est de su 80-85%.
