Su pranu de potentziamentu de s’orgànicu de Forestas, divididu in tres annos, previdet de leare in totu 630 persones, pro un’ispesa de 20 milliones de èuros.
Sa Regione at autorizadu, e intro de custu mese s’ant a definire sas modalidades de sas provas de seletzione, comente at comunicadu s’assessore a s’ambiente Marco Porcu.
In una riunione de sas cummissiones Personale (ghiada dae Andrea Piras de sa Lega) e Ambiente (ghiada dae Giuseppe Talanas de Forza Italia) si sunt verificadas sas atividade fatas, ascurtende a sos assessores Marco Porcu (Ambiente) e Andreina Farris (Personale) e a sos dirigentes de Forestas e de Aspal.
Custu s’est pòdidu fàghere finas gràtzias a su pàrrere legale positivu dadu dae s’avocadura regionale in contu de su cullegamentu intre assuntziones programmadas e residèntzia, chi at a permìtere chi su primu grupu de operajos ispetzializados (unos 450) comintzent a traballare in antis de comintzare sa campagna contra de sos fogos.
In sa discussione ant faeddadu sos cussigeris Roberto Caredda (Misto), Salvatore Corrias (Pd) e Diego Loi (Alleanza Europa Verde).
De sas assuntziones prevìdidas, una parte interessat finas sos cantieris de Forestas chi sunt in provìntzia de Aristanis.
(GF.P.)
