Cun s’annu nou s’Arst at a cunformare sas cursas de sos postales a s’oràriu de intrada a iscola de sos alunnos. Dae eris 9 de ghennàrgiu, s’azienda de trasportu at modificadu sos oràrios de unos cantos postales pro permìtere a sos istudiantes de imbàtere in oràriu a iscola, comente est ispiegadu s’Arst in su situ suo.
Sa lìnia 415 chi passat in Samugheo-Fordongianus-Ula-Busache-Abbasanta at antitzipadu a sas 7.05 sa cursa feriale 2 Abbasanta-Fordongianus (in antis fiat a sas 7.10). Sa cursa feriale 3 Fordongianus-Abbasanta est antitzipada a sas 7.38 (in antis fiat a sas 7.43). Custu at a permìtere a sos chi istùdiant in sas iscolas de Ilartzi de imbàtere in oràriu.
Pro permìtere sa puntualidade a sos istudiantes chi andant a iscola in Aristanis, imbetzes, s’Arst at cambiadu sos oràrios de cursa de sas lìnias 419, 420 e 421.
In manera particulare, sa lìnia 419 (Sèneghe-Milis-Aristanis) at a mòvere a sas 7.05 in sa cursa feriale 1 Sèneghe-Aristanis. Finas sa lìnia 420 (Aristanis-Tzeddiani-Narabuìa) at a mòvere 5 minutos in antis, e gasi finas sa cursa feriale 2 Narabuìa-Aristanis (7.22 e non 7.27) e sa cursa 1 Aristanis-Narabuìa (6.50 e non 6.55).
Sa cursa iscolàstica 5 de sa lìnia 423 Abbasanta-Santu Lussurzu-Milis-Aristanis) at a mòvere a sas 7.31 e no a sas 7.37.
B’at cambiamentos finas in sa lìnia 9226 Bosa-Montresta-Santa Maria. “Pro permìtere sos cullegamentos iscolàsticos, a pustis chi s’Istitutu Pischedda de Bosa at adotadu sa chida curtza – si leghet in sa nota de s’Arst – s’ant a modificare unos cantos oràrios de partèntzia”. Sa cursa feriale 1 at a mòvere dae s’istatzione de Bosa a sa una e mesa (h 13.30) e sa cursa 3 chi biàgiat dae su lunis a sa chenàbura a sa una e mesa (h 13.30).
(GF.P.)
