Micheli Pinna, filòsofu e iscritore, est mortu eris in Tàtari a s’edade de 70 annos.
Su professore, diretore iscientìficu de s’Istitutu “Camillo Bellieni” (Is.Be.) chi aiat contribuidu a fundare in su 1989, fiat nàschidu in su 1952 in Bono e aiat passadu sa pitzinnia intre Bono e Burtei.
A pustis laureadu in filosofia, a pustis fata atividade de chirca intre Gènova, Parigi e Bochum, pro 40 annos professor Pinna at traballadu comente professore de filosofia in sos litzeos.
Fundadore de s’Ofitzina Filosòfica de Is.Be. nàschida pro chircare de pònnere òrdine in su disòrdine de su mundu de oe, fundadore de sa rivista “Sesuja” e diretore de paritzas collanas editoriales, at publicadu libros de argumentu filosòficu, psico-antropològicu e literàriu e finas carchi libru de poesia in ue chircat de dare risposta a sa pregunta eterna de s’òmine chi cheret ischire su “pro ite” de sas cosas.
De sentimentos sardistas, impignadu dae semper in difesa de sa limba sarda, in sos ùrtimos annos at gherradu pro otènnere s’inserimentu de su sardu in sa programmatzione de Rai Regione.
Una de sas ùrtimas essidas pùblicas est istada sa presentatzione de sa trata de istandard ortogràficu de sa limba turritana, chi at bidu s’Is.Be. comente coordinadore.
S’interru at a èssere oe a sas 3 (h 15,00) in Bono. Chie lu cheret saludare pro s’ùrtima borta podet andare a sa “Casa funeraria Rossana” in carrera de sas Rughes, 1 – Tàtari finas a sa una (h 13,00).
(GF.P.)
