Su Servìtziu de Igiene e sanidade pùblica de sa Asl de Aristanis, in totu sa provìntzia, a manera gratùita est faghende su vatzinu contras de su fogu de Santu Antoni.
Custu vatzinu est cussigiadu a totu sos chi tenent prus de 50 annos, essende sos prus chi ddis ataca su virus, e a sos sugetos fràgiles dae sos 18 annos e prus, chi podent prenotare un’apuntamentu pro si vatzinare in s’ambulatòriu de Igiene pùblica de riferimentu de sos chi bi sunt in sa provìntzia.
Sas sedes e sos oràrios de abertura s’agatant in su situ www.asloristano.it>Sedi ambulatori di Igiene Pubblica.
In Aristanis su vatzinu si podet fàghere sentza prenotatzione, andende in deretura a su Servìtziu de Igiene pùblica (carrera Carducci, 35) su martis o sa giòbia, dae sas 9.00 de mangianu a sa 01.00 (h. 13.00) o dae sas 03.00 (h. 15.00) a sas 06.00 (h. 18.00) de merie. A sos chi est cussigiadu de fàghere sa de tres e sa de bator doses anti-Covid ant a pòdere fàghere ambos sos vatzinos in sa matessi ocasione, anti-herpes e anti-Covid ca non bi sunt controidas.
Sos chi sunt in sos Ricòveros pro sos betzos e in sas Rsa de sa provìntzia, pedende∙ddu s’istrutura e cun su cunsensu de sos familiares, sos operadores de su Servìtziu de Igiene e sanidade pùblica ddos podent vatzinare in sas istruturas etotu.
S’Herpes Zoster, connotu comente su “fogu de Santu Antoni”, est una maladia frecuente e chi debìlitat, chi cumparit cando torrat a èssere ativu su virus de sa pigota, chi abarrat cuadu in su sistema nervosu. S’infetzione faghet essire bulluncas chi pròvocant dolore, brusiore e iscarfìngiu. A pustis de sa fase mala de sa maladia, podent essire cumplicàntzias comente sos dolores a sos nèrbios, chi pròvocant dolore forte e pro tempus meda e a pagu serbint sas terapias a disponimentu.
Su fogu de Santu Antoni atacat su prus a sos antzianos: duas partes de tres de sos casos si manifestant in persones chi tenent prus de 50 annos.
A pustis de 2-6 meses dae sa prima dose si nde depet fàghere un’àtera. Cun su vatzinu est prus bassu s’arriscu chi su virus s’isvilupet, ma prus che totu amparat dae sos dolores a sos nèrbios a pustis de s’infetzione: s’eficatzidade sua est prus arta de su 90 pro chentu pro sos chi tenent prus de 50 annos e tra su 70 e su 90 pro chentu in sas persones fràgiles de prus de 18 annos. Su vatzinu si podet fàghere paris cun cussu antinfluentzale, antipneumococcica, anti tètanu-difterite-pertosse e anti-Covid. Est mègius a non ddu fàghere si unu tenet callentura arta.
(MM)