Sas atividades chi sa Caritas de sa diòtzesi dèdicat a sos giòvanos ant a èssere sa parte printzipale de un’atopu programmadu in Aristanis pro cras (giòbia 29 de nadale) a sas 10 de mangianu in s’Istitutu de formatzione teològicu-pastorale in carrera Casteddu 181.
“Sa Caritas cun e pro sos giòvanos” est su tìtulu de custa initziativa, e b’at a partetzipare finas s’archipìscamu mussegnore Roberto Carboni.
At a èssere un’ocasione pro torrare a ammentare, cun contos e testimoniàntzias, sas atividades e sas atentziones chi sas Caritas de Aristanis sunt dedichende a sos giòvanos de sa diòtzesi.
A sa fine de s’atopu, s’archipìscamu Carboni at a cunsignare sas bursas de istùdiu a sos diplomados de s’annu iscolàsticu 2021-2022, iscritos a su primu annu de unu cursu de làurea pro s’annu acadèmicu 2022-2023, chi ant aderidu a su bandu de sa Caritas diotzesana de Aristanis.
“Poberesa econòmica e poberesa educativa sunt ligadas a pare e non si podet fàghere nudda pro una si non si tenet contu finas de s’àtera - ispiegat sa diretora de sa Caritas diotzesana Giovanna Lai -. Istrutzione e formatzione sunt importantes meda pro prevènnere s’esclusione sotziale e pro parare fronte a totu sas formas de emarginatzione”.
“S’atopu, abertu a totus, tenet comente fine de interessare e sensibilizare a totu sa comunidade, in manera particulare a sos giòvanos. Paba Frantziscu, faeddende a sos giòvanos, at naradu “Cun sos ogros abbaidade semper a su benidore. Faghide.bos terrinu bonu caminende cun s’umanidade, faghide.bos rinnovamentu in sa cultura, in sa sotziedade e in sa Crèsia. Bi cheret ànimu, umiltade e de ischire ascurtare pro mustrare su rinnovamentu” finit sa diretora de sa Caritas diotzesana de Aristanis.
(GF.P.)
