Torinu puru ocannu festat sa Die de sa Sardigna.
S’assòtziu de sos sardos “Antonio Gramsci” at detzisu de presentare su libru de Francesco Casula intituladu “Carlo Felice e i tiranni sabaudi” e s’idea originària fiat de lu fàghere in su Museu de su Risorgimentu, logu de valore simbòlicu mannu ca est ospitadu in su Palatzu Carignano, sede de su primu Parlamentu subalpinu (1848-1861) e de su primu Parlamentu de su Regnu de Itàlia (1861-1864).
A dolu mannu, a pustis de unu mese dae sa richiesta non b’at istadu risposta e s’est cumpresu chi su tìtulu de su libru no agradaiat, chi cheriat unu pagu “acontzu” pro non dispràghere a niunu. Finas sa promissa de su diretore Ferruccio Martinotti de presentare sa richiesta a su Cussìgiu su 26 de abrile est pàrsida prus formale chi no àteru, bidu chi diant èssere mancado sos tempos tècnicos pro organizare s’eventu.
Sa presentatzione, duncas, s’at a fàghere in un’àteru logu simbòlicu: sa “Sala Colonne” de sa Domo comunale. Sos traballos los at a coordinare Enzo Cugusi e su libru l’at a presentare Giuseppe Melis Giordano paris cun s’autore Francesco Casula. A pustis, Tina Cosseddu at a cantare carchi otava de “Su patriotu sardu a sos feudatàrios” e de “Nanneddu meu”, acumpangiada dae sas launeddas de Nicola Diana.
S’apuntamentu est pro giòbia 28 de abrile 2022 a sas 4 de sero (h 16,00) e at a èssere un’eventu importante siat pro su logu in ue si faghet, siat pro sa presèntzia de parlamentares, sìndigos, cussigeris regionales e comunales sardos elègidos in Torinu e in Piemonte.
(GF.P.)
