Su 20 de nadale 2013 s'Assemblea generale de sas Natziones Unidas, cun una risolutzione ONU, at detzìdidu de proclamare, su 3 de martzu, sa die internatzionale de sa natura agreste sighende s’àndala de sa Cunventzione(chi est de su 1973) in contu de su cummèrtziu internatzionale de sa flora e fàuna agrestes minetzadas de si nche ispèrdere.
Est de importu mannu pro no ispèrdere e pèrdere sos ecosistemas de sa Terra chi sos animales e sas matas e erbas de ogni ambiente naturale siant sarvados e amparados e pròpiu a custu argumentu est dedicada s’editzione de su 2022.
Su valore de sa natura, de sos animales e de sas matas est mannu: est iscientìficu, culturale, ecològicu, genèticu, sotziale, econòmicu, educativu e fintzas ricreativu, pertocat s’istare bene de sas persones e s’isvilupu sustenìbile.
Sa die est nàschida pro tzelebrare e fàghere a pensare a sa fàuna e flora agreste chi s’agatat peri su mundu e chi bortas meda sunt in perìgulu pro curpa de s’òmine etotu.
Gente meda in su mundu bivet a intro o acanta de forestas o ecosistemas in ue bivent ispètzies chi permitint, su prus a cussa gente etotu, de bìvere: dant s’ite papare issoro, energia, meighinas, materiales pro fraigare domos o in cale si siat modu giassos in ue s’amparare, materiales pro si bestire.
