Sa Die internatzionale de sa Terra est sa manifestatzione ambientale prus manna de su mundu. Ogni annu, in custa die, tzitadinos meda, de 192 paisos de su mundu tzèlebrant sa Terra e promovent s’amparu suo.
In su 2009, cun una Risolutzione, s’Assemblea Generale de sas Natziones Unidas at seberadu de tzelebrare custa ricurrèntzia ogni annu su 22 de abrile, unu mese e duas dies a pustis de s'ecuinòtziu de beranu.
S’ONU at connotu s’importàntzia e sa responsabilidade chi totus tenimus pro amparare sa natura e sa Terra e pro lòmpere a un’echilìbriu tra sos bisòngios econòmicos, sotziales e ambientales chi siat profetosu pro sa generatzione nostra e pro cussas chi ant a bènnere a pustis de nois.
Sa prima Die internatzionale de sa Terra est istada in su 1970 ma s’idea est nàschida in su 1962, in sos annos de sa protesta contra de gherra in Vietnam, cando su senadore americanu Nelson aiat pensadu de cuncordare cunferèntzias e initziativas dedicadas a s’ambiente e chi ant otentu sa partetzipatzione de gente meda, de polìticos, fintzas de Robert Kennedy.
In su 1969, a pustis de su dannu mannu chi at tentu s’ambiente dae su petròliu essidu a foras dae unu putzu in Califòrnia, su senadore Nelson aiat pensadu chi esseret lòmpida s’ora chi s'opinione pùblica e sos polìticos esserent resonadu de custos argumentos ca “totu sas persones, sentza distintzione acapiada a su pòpulu issoro, si mascros o fèminas, de cale siat su rèdditu issoro o de chie siant e in ue bivant, tenent su diritu de bìvere in un’ambiente sanu, echilibradu e sustenìbile”.
Comente a s’ora, fintzas oe, b’est de gherrare contras de s'incuinamentu chi tenimus dae sos combustìbiles, contras de s'incuinamentu de sas fàbricas e de sas tzentrales elètricas, sos refudos tòssicos, sas meighinas dannosas in agricultura, sa desertificatzione chi sighit a avantzare e unu muntone de àteros dannos comente s'incuinamentu de s’àera, de s’abba e de su terrinu, su muntone mannu de genias vegetales e animales chi si nche isperdent in presse. Est de importu agatare e impreare sas solutziones giustas, mudare su tràgiu de sa vida nostra imparende a no impreare sustàntzias chìmicas chi faghent dannu, cando faghet a impreare a nou sos materiales chi si no si nche fùliant, a non distrùere ambientes comente sos buscos o sos mares e àteras cosas meda.
(MM)
