Su 25 de austu 2022 su sìndigu Massimiliano Sanna at retzidu in s’àula de su Cussìgiu comunale sa Dinamo Banco di Sardegna in formatzione 2022-2023.
S’iscuadra fiat in Aristanis dae carchi die e sos tifosos tzitadinos l’ant retzida cun cuntentesa manna.
A sa riunione cun sas istitutziones b’at partetzipadu totu s’iscuadra acumpangiada dae su presidente Stefano Sardara, dae su diretore generale Federico Pasquini, dae s’allenadore Piero Bucchi e dae totu su personale tècnicu. In su Palatzu de sos Iscolòpios sos gigantes ant faeddadu cun su primu tzitadinu, cun s’assessore a s’Isport Antonio Franceschi e cun su presidente de sa Cummissione Isport Paolo Angioi chi ant retzidu cun totu sos onores a su presidente de sa Dinamo Banco di Sardegna Stefano Sardara, s’assessore regionale Anita Pili, su diretore generale de su Bancu de Sardigna Giuseppe Cuccurese, s’amministradore delegadu Francesco Sardara, su diretore generale Federico Pasquini e su capitanu Jack Devecchi.
Su sìndigu at torradu gràtzias a sa Dinamo pro sa presèntzia in Aristanis ammentende s’inauguratzione de su palatzeddu in su 2019 e ponende in evidèntzia s’impignu de Oristano Basket e de su presidente Erasmo Deligia.
Massimiliano Sanna at sutaliniadu cantu s’isport siat importante pro sa crèschida de sa tzitade, non solu in àmbitu sotziale ca imparat a sos giòvanos valores importantes, ma finas pro s’isvilupu de su territòriu. Sa presèntzia de sa Dinamo Banco di Sardegna est importante meda finas ca testimòniat s’etzellèntzia de sos Sardos in àmbitu natzionale e internatzionale.
A sa fine de s’atopu, su sìndigu at cunsignadu a sos òspites una publicatzione dedicada a sa Sartìglia, in augùriu de bonas resèssidas benientes, pro dare lustru a sa Sardigna.
(GF.P.)
