Sa “Fondazione Oristano” at publicadu s’avisu pro sa seletzione de unu professionista esternu pro li dare un’incàrrigu de agiudu a su RUP pro sas atividades tècnicu-amministrativas de su progetu chi tenet in intentu de nde bogare sos impedimentos fìsicos, de connoschèntzia e sensoriales in su museu Antiquarium Arborense, finantziadu a intro de su PNRR.
S’incàrrigu punnat a dare assistèntzia in su preparare sa documentatzione e in su averiguare chi sas cosas si fatzant bene, siat in fase operativa siat in fase de rendicontatzione, monitoràgiu e verìfica de su pranu econòmicu-finantziàriu chi pertocat s’interventu.
Pro èssere ammìtidos a sa seletzione tocat a tènnere, in prus de sos tìtulos generales, sa làurea magistrale e s’abilitatzione professionale a sos servìtzios de architetura e ingegneria, sa connoschèntzia de sa normativa e de sos progetos finantziados cun su dinari comunitàriu de su PNRR, sa connoschèntzia de sos protzedimentos e de sos trastos pro pònnere in òpera, gestire e monitorare su dinari de sos investimentos europeos (pro esempru s’elaboratzione de sistemas e de trastos de gestione e controllu), sa connoschèntzia de sos programmas informàticos impreados a dies de oe.
Sa domanda cheret mandada ebbia cun posta eletrònica tzertificada (PEC) a s’indiritzu fondazione@pec.fondazioneoristano.it intro de sas 9 de mangianu de su 13/02/2023 e devet cuntènnere custu ogetu: “Domanda di partecipazione alla procedura di selezione per l’affidamento dell’incarico di supporto al RUP per l’espletamento delle attività finanziate dal PNRR”.
Su bandu si podet lèghere in sa setzione “Fondazione trasparente - Bandi di concorso - Selezioni attive” de su situ www.fondazioneoristano.it.
Pro informatziones e crarimentos si podet mandare una PEC a “Fondazione Oristano” a s’indiritzu
fondazione@pec.fondazioneoristano.it.
(GF.P.)
