Sa Giunta Sanna at aprovadu sos progetos pro sos cantieris noos de su programma “LavoRAS”.
Sos progetos, presentados dae sos assessores a s’Ambiente Maria Bonària Zedda, a sos Traballos pùblicos e manutentziones Simone Prevete e a su Patrimòniu Ivano Cuccu, prevident un’investimentu totale de 363mìgia èuros, pro una trintina de traballadores noos.
“LavoRAS est una misura regionale chi punnat a fàghere crèschere e a amparare s’ocupatzione pro mesu de polìticas de ativatzione, de agiudos e de àteras misuras pro afortigare s’ocupabilidade – ponet in craru Massimiliano Sanna -. Cun LavoRAS cherimus finas afortigare s’isvilupu de sos territòrios e sa difesa de sos benes comunes amparende su patrimòniu de su territòriu provintziale, orientende s’atividade de sos cantieris in favore de sa preventzione pro minimare sas cunseguèntzias de sas calamidades naturales, megiorende s’impreu de sas terras pùblicas e de s’atzessibilidade a su patrimòniu culturale e archeològicu, faghende crèschere sa digitalizatzione de sas bancas de datos de sos Comunes, valorizende su patrimòniu culturale e su patrimòniu immobiliare pùblicu”.
“Su Comune de Aristanis – agiunghet su sìndigu Sanna – partètzipat cun tres progetos a cura de sos assessorados e setores comunales. Su primu pro sos traballos pùblicos pro 262mìgia èuros e 22 traballadores, su segundu pro s’isvilupu de su territòriu pro 75mìgia èuros e 6 traballadores, su de tres pro su setore programmatzione e gestione de sas risursas pro 26mìgia èuros e 6 traballadores. Previdimus de fàghere su mantenimentu ordinàriu de iscolas e àteros fabricados de su patrimòniu comunale, de registrare sos benes de su patrimòniu pùblicu, los acatastare, predispònnere s’atestadu de prestatzione energètica, verificare in cale cunditzione sunt, acontzare e fàghere manutentzione. Previdimus finas interventos pro valorizare sos logos pùblicos chi potzant ospitare atividades sotziales, culturales e econòmicas pro megiorare s’istrutura sotziale, finas recuperende e torrende a impreare edifìtzios isbandonados o impreados pagu”.
(GF.P.)
