Eris, domìniga 6 de santandria, at torradu a abèrrere sa Pinacoteca comunale “Carlo Contini”.
Sa Pinacoteca, gestida dae sa “Fondazione Oristano”, est collocada in s’Hospitalis Sancti Antoni e at a abèrrere onni die dae sas 10 a sa una (h 13,00) e dae sas 4 a sas 7 (h 16,00-19,00).
Sa Pinacoteca, chi torrat a abèrrere a pustis fatos traballos de mantenimentu, òspitat paritzas òperas: sas primas chimbanta las aiat regaladas Giovanni Battista Sanna Delogu (Ilartzi 1895-1970) in su 1969, cun s’ùnicu vìnculu de èssere ammentadu, issu e mugere sua, in intro de sa pinacoteca.
Custas primas òperas (Giuseppe Biasi, Antonio Ballero, Felice Melis Marini, Mario Delitala, Carmelo Floris, Pietro Antonio Manca) ponent in evidèntzia una sensibilidade e una cumpetèntzia raras, in gradu de cumprèndere sas personalidades prus rapresentativas de s’arte de sos primos annos de su Noighentos. A custas si bi sunt agiuntas sas òperas de Francesco Ciusa, Melkiorre Melis, Carmelo Floris, Giovanni Marras, Foiso Fois, Carlo Contini, Dino Fantini, Antonio Atza, Ermanno Leinardi, Antonio Corriga, Antonio Amore, Maria Lai e Pinuccio Sciola, chi in parte benint dae sa colletzione Sanna Delogu e in parte dae àteras donatziones o dae còmporos fatos dae su Comune.
(GF.P.)
