Sa crèsia de Sàgama dedicada a s’arcànghelu Gabrielle fortzis dd’ant fraigada in ue bi fiat unu fràigu medievale e in antis unu tèmpiu paganu.
In su 1606, cun unu cuntratu fatu dae su retore Anjoi e tres picapedreris de Tàtari, ant comintzadu a fraigare sa crèsia copiende su modellu de cussa de Santu Giagu de Tàtari.
A intro tenet una navada ebbia cun sa bòveda a bombè, arcos e bator capellas. In sa crèsia bi sunt artares in linna, un’istàtua pretziosa in linna de s’ànghelu Gabrielle, sa trona de su de XVII sèculos, cuadros de s’Iscola de su Setighentos (Su Naschimentu de pintore anònimu, sa Piedade de su pintore grecu Elias Commeno e àteros), arredos sacros de valore.
Sa fatzada in perda bianca est bella meda; bi sunt corniciones e unu tìmpanu chi andat in tundu. Su campanile, postu a manu manca, in punta tenet unu tzimbòriu piticu "a chibudda".
A inghìriu de sa crèsia bi fiat una corte serrada dae muros e cun s’intrada a arcu chi ant betadu, prus o mancu in su 1900, pro nche fàghere passare Istrada reale chi a pustis est diventadu s’istradone cursu Vittorio Emanuele III. In custa crèsia pro unos cantos sèculos ant interradu sa gente de Sàgama.
In Sàgama, ogni annu su 24 de martzu, afestant s’arcànghelu Gabrielle cun una festa manna.
(Sa fotografia est leada dae su situ de Diòtzesi de s'Alighera - Bosa)
(MM)
