In carchi iscola de sa Provìntzia e in carchi crèsia chi tenet arredos de linna de valore giai dae su 2002 sunt istadas agatadas, de seguru, unas cantas impestaduras de formiga de sa linna. Sunt bobboeddos chi simìgiant a sa formiga bianca chi papat sa linna, sa tzellulosa e materiales sìmiles.
Sas prus dannosas sunt sas colònias de formiga de sa linna suterràneas Reticulitermes lucifugus chi faghent sos nios issoro in su terrinu a in ghiru de sos edifìtzios e a pustis andant in sa linna de sos serramentos, in sa parte chi est in su terrinu fintzas a intrare (passende in cavos de su telèfono, cavos diferentes, partes de linna,…) a intro e fàghere dannu a cale si siat istrutura de linna.
Faghent dannu mannu ca si nche papant sa linna a intro, dd’isbòidant o issas etotu remplasant sa linna ma sentza dare cunsistèntzia mancari a intro e in foras non si biat nudda. Duncas est difìtzile meda de si nde agatare de s’impestadura, si no cando sa linna est giai papada meda e sas istruturas non serbint prus.
Fintzas a pagu tempus a como pro ispèrdere sa formiga de sa linna s’impreaiant in superfìtzie sustàntzias chìmicas, a fumentos o lìcuidos, ma cun resurtados non definitivos ca abarraiat su niu suta de terra e sos bobbois istorbados, ma non ochidos, sighiant a fàghere dannu in un’àteru giassu.
(MM)
