Dae sa riunione de sa segunda Cummissione cunsiliare est essidu chi sa biblioteca de Aristanis l’at a gestire ancora su Comune e chi su bandu de gara publicadu dae pagu est pro s’esternalizatzione de su personale.
Su presidente de sa Cummissione, Antonio Iatalese, ispiegat chi non b’at possibilidade de assùmere gente: “Sas ùrtimas assuntziones las amus fatas in àteros setores chi teniant prus bisòngiu”.
“S’assessore nos at asseguradu chi at a èssere ancora su Comune a gestire sa biblioteca pro mesu de s’Ufìtziu Cultura” at cummentadu sa vitze presidente de sa Cummissione Francesca Marchi, chi narat finas chi non b’at istadu condivisione.
A pustis de su pensionamentu de sa diretora Enrica Vidali non b’at prus diretore ma su servìtziu at a èssere coordinadu dae sa responsàbile de s’Ufìtziu Cultura Roberta Fais.
S’apaltu pro biblioteca e mediateca est de tres annos e pertocat finas sas fratziones de Donigala Fenughedu, Nuraxinieddu, Silì e Turre Manna. Pro tres annos b’at a disponimentu 880mìgia èuros e tocat de assegurare 7.696 oras de abertura a s’annu (148 oras a sa chida) cun 4 operadores; pro su servìtziu de mediateca b’at 1.152 oras (24 a sa chida) e pro sas fratziones sunt prevìdidas 4.608 oras a s’annu (96 a sa chida) cun 5 operadores.
Sas domandas cherent mandadas in su portale www.sardegnacat.it intro de sa una (h 13,00) de s’11 de freàrgiu. Pro sa gara s’at a fàghere una protzedura aberta sighende su critèriu de s’oferta prus cumbeniente, ma custu est ponende pensamentu a su grupu de minoràntzia chi timet chi un’oferta tropu bassa potzat creare problemas pro su pagamentu de sos dipendentes.
(GF.P.)
