In tema cun custas dies chi sunt dedicadas a onorare sos mortos, s’agentzia fùnebre Melis, chi òperat in Aristanis dae su 1981, proponet un’aplicatzione noa dedicada de su totu a su lutu.
Iscarrighende.la in su telefoneddu si tenet sa possibilidade de èssere semper informados in contu de sas mortes, de pòdere dare cunfortu a sas famìllias in lutu cun messàgios o firma de su libru eletrònicu, de mandare billetes de ringratziamentu e cartas de mortu, de agatare sena dificultade su logu de s’interru o sa tumba pro more de su servìtziu de geolocalizatzione.
S’aplicatzione mandat una notìfica onni borta chi si pùblicant annùntzios de morte, de missas de mese o de annu. Si podent mandare sas passèntzias in messàgiu privadu a sa famìllia o firmare su libru eletrònicu pro sas firmas.
Cun custa aplicatzione si podent finas mandare sos billetes de ringratziamentu, sa carta de ammentu de su mortu o unu vìdeu de ammentu a àteros utentes de s’app.
Chie cheret iscarrigare s’aplicatzione podet intrare in sa pàgina de Linkoristano, in ue si agatant sos link pro sa versione Android e pro sa versione iOS (https://www.linkoristano.it/dal-territorio/la-prima-app-dedicata-interamente-al-lutto-grazie-a-melis-onoranze-funebri/).
(GF.P.)
