Adiconsum Sardigna at detzìdidu de presentare tres espostos – a s’Antitrust, a su Garante de sa privacy e a sa Politzia postale – pro pedire indàgines in contu de sa trampa in ue nche sunt rutos, in Sardigna e finas in sa provìntzia de Aristanis, sos chi tenent contu currente abertu cun sas bancas de su Grupu Bper.
Gente meda, rispondende a unu messàgiu sms chi pariat benende dae su nùmeru telefònicu de sa banca – ant cumpiladu un’ischeda online chi imbetzes daiat in manos de sos tramperis sos còdighes de sa carta de crèditu o de s’online banking.
“A pustis de sos reclamos presentados dae sos consumadores interessados, Bper est iscarrighende subra de sos clientes sa responsabilidade ca ant dadu sos datos personales a àtere, e non cheret torrare su dinari a chie l’at pèrdidu” ispiegat una nota de Adiconsum firmada dae su presidente Giorgio Vàrgiu.
A pustis invitados “totu sos consumadores trampados a cuntatare in presse sas sedes locales de Adiconsum pro tènnere agiudu e amparu”, Adiconsum pedit a Bper de “dare comunicatzione cando b’apat atacos de sos hacker o b’apat clientes chi in custos ùrtimos tempos apant tentu fura de datos, bidu chi b’at tropu gente chi est retzende custos messàgios”.
Comente funtzionat custa trampa noa? “Est su chi si narat “smishing”, una forma de “phishing” chi impreat sos telefoneddos comente prataforma de atacu dae parte de sos cybercriminales – ispiegat su presidente de Adiconsum -. Sos consumadores retzint in su telefoneddu unu messàgiu sms chi paret chi bèngiat dae sa banca issoro, in ue si pedint informatziones finantziàrias o personales, comente su nùmeru de contu o de carta de crèditu. Chie nche ruet in sa trampa tzedet sos datos suos a gente malintentzionada e, in prus de sa fura de informatziones sensìbiles, nche li furant su dinari dae su contu”.
A pàrrere de Giorgio Vargiu “est pròpiu su chi est capitende in Sardigna a paritza gente chi tenet su contu in Bper. A chentinas ant crètidu chi esseret sa banca a pedire sos datos cun sms, e s’ant agatadu su contu isbagantadu. In custas dies custa cosa est finas crèschida, a pustis chi sos traballadores e sos pensionados ant tentu acreditadas sas “tredicèsimas”.
(GF.P.)
