Sa Regione dat tres milliones de èuros a sos massajos e a sos pastores chi ant tentu dannu dae su fogu passadu in Monteferru in su 2021. S’assessora regionale a s’Agricultura Murgia, ischidende ca sas aziendas agrìculas e zootècnicas ant sufertu meda s’emergèntzia de su fogu e como fintzas una crisi internatzionale grae meda, narat craru ca est netzessàriu coitare cun sos agiudos.
Sos fogos chi in sas ùrtimas dies de su mese de trìulas de su 2021 ant brusiadu su Monteferru ant fatu dannu mannu a su sartu, a su territòriu e at fintzas brusiadu totu su chi sos pastores aiant incungiadu pro su bestiàmene issoro.
Sa Regione ponet in contu s’indennizu pro sa proenda e su mangime, pro sos animales mortos (pecos bùulos, caddos, berbeghes, crabas e fintzas pro s’ispesa pro eliminare sos animales mortos, pro ogni casiddu brusiadu e ogni abe reina pèrdida. S’indennizu pertocat fintzas sa proenda de tres meses pro su bestiàmene sarvadu.
Sa Regione at postu fintzas 1.150.000 èuros pro sos olivàrios de su Monteferru chi ant tentu su matessi dannu dae su fogu in su 2021 e chi s’Agentzia Agris at a torrare a pònnere o at a recuperare cun unu progetu regionale.
(MM)
