S’at a fàghere chenàbura 14 de santugaine a sas 5 de sero (h 17), in sa Sala cunferèntzias de s’Hospitalis Sancti Antoni, s’assemblea pùblica pro faeddare de sos problemas de sa sanidade in Aristanis e in su territòriu.
Sa riunione est aparitzada dae su Comune de Aristanis cun sa punna de pònnere paris preguntas, propostas e ideas pro fàghere una prataforma de programmas pro sa sanidade aristanesa.
“Est unu passàgiu nou in su caminu sestadu dae custa amministratzione pro parare fronte a sa crisi de sa sanidade – ispiegat su sìndigu Massimiliano Sanna -. Semus traballende pro fàghere nàschere una retza de collaboratzione chi agiuet a risòlvere sos problemas, e in custu sensu tocat a lèghere sas initziativas incarreradas in custos primos meses de guvernu. A pustis de sas riuniones cun su diretore generale de s’Azienda sanitària e cun su Comitadu pro sa salude, e a pustis chi su manager de sa ASL at bidu sos cussigeris comunales, aparitzamus unu momentu de riflessione e de cunfrontu pùblicu, abertu a chie totu cheret dare su contributu suo a sa discussione in contu de sanidade. Sa punna est de fraigare una base de programmas pro nos pònnere a cunfrontu cun chie est guvernende sa sanidade a onni livellu”.
“At a èssere un’assemblea aberta a totus, ca sa sanidade est unu bene de totus – ispiegat su sìndigu Sanna -. Sa gente (a sa sola o riunida in comitados) tenet unu pesu importante pro dare ideas e fortza a sos progetos de sas istitutziones. Gasi, rispetende un’impignu leadu a dae in antis de totus in sas chidas passadas, damus a sa tzitade unu momentu de cunfrontu pùblicu e de proposta”.
S’assemblea s’at a fàghere dae sas 5 a sas 8 de sero (h 17-20). Pro permìtere a totus de faeddare, sos interventos non podent durare prus de 5 minutos.
Si cussìgiat de prenotare s’interventu imbiende una mail a s’indiritzu staff.sindaco@comune.oristano.it.
(GF.P.)
