In Santa Maria Bambina b’at tantas atividades de Nadale chi agiuant a dare allegria a sos repartos e a su Tzentru diurnu integradu.
Giai dae su mese de santandria a sos ricoverados in su Tzentru de riabilitatzione los ant fatos partetzipare a sos laboratòrios pro fàghere sas decoratziones de pònnere in sos aposentos e in sas salas pro retzire sa gente.
Sàbadu passadu sos malàidos ant assìstidu a su cuntzertu de Nadale de su Tzìrculu MCL “S’aposentu de sos sonos / La stanza dei suoni” – sa band de istrumentos “I musicanti” dirìgida dae Daniela Pinna – in una sala decorada dae su presèpiu e dae s’àrbore de Nadale, in un’ària de festa chi pariat sa de sas festas in bidda.
Sighende s’incàrrigu de sa Fundatzione, lunis 19 de nadale s’est fata una missa presièdida dae don Ignazio Pau e cuntzelebrada dae su presidente de su Tzentru mussegnore Gianfranco Murru, chi at fatu sa prèiga e torradu gràtzias pro su traballu nòbile e de calidade fatu dae totu sos operadores de su Tzentru. Unu brìndisi de augùrios at serradu s’atopu.
Martis passadu ant aprontadu pro sos malàidos su torneu de Nadale de “càlcio-balilla”, e totus sunt isetende sa proclamatzione de sos binchidores chi at a èssere su 24 de Nadale.
Custu torneu est adatu finas a chie est in cadrea a rodeddas, ca si giogat impreende unu mòbile prus bassu e largu de sos “calcettos” sòlitos. Su “càlcio-balilla” est s’ùrtima atividade inserida, gràtzias a sa cunventzione cun su Comitadu paralìmpicu italianu de sa setzione Sardigna, chi est andende a in antis dae carchi annu.
B’at atividades laboratoriales finas pro sos òspites de su Tzentru diurnu, chi ant pòdidu bogare a campu sas passiones cuadas e sa creatividade manuale issoro, creende traballos a tema natalìtziu.
In mesu de àteras atividades, sa creatzione de su Villàgiu de Nadale fatu cun domitas de cartone, pintadas e decoradas cun s’agiudu de sos operadores, postas in s’intrada de s’edifìtziu. Pro favorèssere sa cultura de su recùperu de sos materiales, ant impreadu cartone finas pro fàghere botziteddas a forma de isteddu pro decorare sos aposentos internos e sos de impreu comune.
A pustis de totu sas creatziones artìsticas in sos laboratòrios, s’apuntamentu finale est cun sa tòmbola chi s’at a fàghere oe 23 de nadale e at a tènnere comente prèmios sos portacraes fatos dae sos òspites.
Cun sos laboratòrios e cun sas atividades suas, Santa Maria Bambina tenet comente obietivu su de favorèssere sa calidade de sa vida pro òspites e malàidos in un’ambiente abertu a s’amigàntzia, a sas relatziones interpersonales e a torrare a iscobèrrere s’autonomia personale in sas ocasiones comunitàrias e sotziales.
(GF.P.)
