Su 2 de freàrgiu, comente onni annu, si festat sa Presentatzione de Gesùs a su Tèmpiu, chi a su sòlitu est connota in italianu comente “Candelora” e in sardu comente “Santa Maria de Candelas”. Custa festa est antiga meda e si faghet in totue. In Aristanis cumbinat cun su primu atu ufitziale de sa Sartìglia: sa cunsigna de sas candelas beneitas a sos Cumponidoris noos, fata pro manu de sos presidentes de sos Grèmios (Oberaju Majore pro su Grèmiu de sos Massajos e Majorali pro su Grèmiu de sos Mastros de Linna).
Ocannu sos presidentes ant seberadu a Danilo Casula pro sos Massajos e a Giampaolo Mugheddu pro sos Mastros de Linna.
Sa festa de Santa Maria de Candelas, pro sos ritos cullegados a sa Sartìglia, est dae semper unu de sos momentos prus importantes de sa manifestatzione. Ponet paris totu sos chi leant parte a sa cursa, movende dae Grèmios e Cumponidoris pro imbàtere a totu sos aristanesos chi dae sas primas oras de sa die partètzipant a sas funtziones e a sa festa chi marcat s’incomintzu de sa Sartìglia.
A mangianu chitzo si faghent sas missas in ue si beneighent sas candelas (in sa crèsia de Santu Giuanni de Froris pro sos massajos, in Sa Sea pro sos mastros de linna).
Sa traditzione antiga dat a s’Oberaju Majori e a su Majorali su còmpitu de cunsignare sa candela beneita, mudada cun su frocu de su colore de su Grèmiu, a su Cumponidori seberadu, cun s’augùriu solenne chi càmbiat dae unu Grèmiu a s’àteru (“Santu Giuanni t’agiudit” pro sos massajos, “Santu Giusepi t’assistat” pro sos mastros de linna).
PROGRAMMA
Grèmiu de sos Massajos
h 7,30 – missa in sa crèsia de Santu Giuanni de Froris
h 12,00 – cunsigna de sas candelas in domo de sa mama de Danilo Casula (carrera S’Alighera 4)
Grèmiu de sos Mastros de Linna
h 8,30 – missa in Sa Sea
h 12,30 – cunsigna de sas candelas in carrera Marroccu n° 22
Sartilliedda de sa Pro Loco
8,30 – missa in sa crèsia de Santu Efis
10,30 cunsigna de sas candelas in carrera Ciusa (sede de su Tzìrculu Bociòfilu)
Pro Santa Maria de Candelas finas su Grèmiu de sos Mastros de Muru de Santa Lughia faghet sa festa sua: a sas 7 de mangianu, in sa crèsia de su Grèmiu in carrera Parpaglia, s’at a fàghere sa missa sighende s’usàntzia antiga.
(GF.P.)
