Su 2 de freàrgiu s’afestat Santa Maria de candelas. Fintzas custa est una festa chi, in antis de su cristianèsimu, si tzelebraiat in s’ierru, cando s’isetaiant sas dies longas e callentadas dae su sole; una festa dedicada a sa purificatzione e sa lughe chi sa religione cristiana dd’at dedicada a sa presentatzione de Gesùs in su Tèmpiu de Gerusalemme e in antis a sa purificatzione de Nostra Sennora chi ammentaiat su ritu de ‘s’incresiare’, cando sas mama, a pustis de àere partoridu, depiant andare a crèsia pro si purificare, in antis de pòdere essire e andare a àteru logu.
Afestada in ogni bidda de Sardigna, mancari marchet s’intrada in su tempus de carrasegare, est prus che totu festa religiosa cun Missa, protzessiones e beneditzione de sas candelas chi sos devotos si nche leant a domo comente amparu dae cale si siat male. Sas cunfrarias cuncordant cumbidos e/o unu pràngiu o chena totu paris ca est die de importu. In unas cantas biddas, sos cunfrades e sas priorissas retzint sos incàrrigos noos.
In Aristanis su 2 de freàrgiu dd’isetant pro sa nòmina ufitziale de sos Cumponidores de sa Sartìllia. Sos chi faghent parte de sos grèmios, su de sos massajos e su de sos maistros de linna, a pustis de àere iscurtadu sa Missa, ognunu in sa crèsia sua (in Santu Juanni de frores sos massajos e in Catedrale sas maistros de linna) cun sos Oberàius Majoris de sos grèmios etotu, andant ognunu a domo de chie est istadu seberadu comente Cumponidore de sos massajos e de sos maistros de linna, chi retzende sa candela beneita in sa Missa retzint sa nòmina a manera ufitziale.
In domo de sos Cumponidores est die de festa e de emotzione e non podet mancare su cumbidu cun garnatza e durches de mèndula.
(MM)
