Sa limba sarda tenet duos nùmenes pro su de deghe meses de s’annu: in su prus de sas biddas de sa Sardigna meridionale si narat Mese de ledàmene imbetzes in sas biddas de sa Sardigna setentrionale si narat Santugaine.
Mese de ledàmene est ca in custu mese si contzimat, in antis de semenare si ponet su ledàmene pro chi sa terra siat prus fèrtile.
A santu Gaine (o Baìngiu, Bainzu), chi in unas cantas biddas s’afestat su 25 de su mese, est dedicadu su custu mese de s’atòngiu. De custu Santu si connoschent istòrias e paristòrias, esistit fintzas una Passio chi nde contat sa vida paris a Proto e Gianuàriu. Gaine cheret nàrrere ‘chi bivet in Gabium, una localidade de su Làtziu; fortzis fiat unu sordadu romanu chi aiant ochidu e betadu a mare ca aiat fatu fuire àteros duos sordados chi, essende cristianos, ddos aiant inserrados in presone.
In italianu su nùmene Ottobre est s’inditu ca in su calendàriu antigu de Ròmolu fiat su de oto meses de s’annu. Pro pagu tempus su nùmene est istadu Invictus, in onore de s'imperadore Lutziu Aurèliu Commodu, ma a pustis chi est mortu non dd’ant sighidu a impreare.
(MM)
