A pustis de sete annos de ispetàculos de importàntzia internatzionale, s’assòtziu Sardegna Concerti annùntziat chi at a serrare s’esperièntzia fata in su Parcu de sos Sonos de Arriora, sede de ispetàculos musicales importantes in sos ùrtimos annos.
Est unu sèberu fatu cun suferèntzia, dant a ischire sos organizadores, e fatu cun s’isperàntzia chi sas istitutziones cumprendant chi su Parcu de sos Sonos e de sas Artes cheret contivigiadu, non lassadu che depòsitu de arga.
Custu sèberu l’ant comunicadu a pagas dies dae sa bona resurtada de s’ùrtimu ispetàculu de Ben Harper su 9 de austu apenas coladu: “Sa cuntentesa nostra non mìnimat su dispraghere pro su fatu chi in s’ùrtima organizatzione de s’eventu nd’at essidu paritzas mancàntzias chi ant causadu incòmodu a sos ispetadores, màssimu a sos disàbiles chi nois a su sòlitu atentzionamus meda” ispiegant sos organizadores de Sardegna Concerti.
“Nos iscusamus cun totu sos chi nd’ant patidu sas cunseguèntzias e nos nd’assumimus sa responsabilidade. Depimus sutaliniare chi sas mancàntzias chi si sunt verificadas pro su cuntzertu de Ben Harper sunt cunseguèntzia de sas dificultades econòmicas e de sistematzione chi, mancari apemus fatu isfortzos mannos in sos ùrtimos sete annos, non permitint chi custa istrutura (una de sas mègius de Europa) s’isvilupet comente meresset” sighint.
Sa detzisione, chi est nàschida giai dae s’annu coladu, est istada rinviada finas a finire su cuntzertu de Ben Harper “pro no iscuntentare sos 5 mìgia apassionados chi ant prenu su Parcu de sos Sonos a pustis de tres annos de isetu, ricumpensados dae sa prestatzione bella meda de s’artista istatunitense”.
In sos ùrtimos sete annos, Sardegna Concerti at promòvidu eventos internatzionales mannos chi ant bidu in su palcu divos comente Negramaro, Carmen Consoli e Max Gazzè.
(GF.P.)
