Sa Sartìglia finit cun s’arremada: su Componidori passat corcadu a ischina in segus subra de su caddu e faghet sa rughe cun sa Pipia de maju pro beneìghere sa gente.
Custa de s’arremada est una traditzione antiga e màgica.
Su mistèriu de su significadu de sa paràula arremada no est istadu ancora isortu e nois puru, a pustis lèghida crchi etimologia in sos social network, cherimus provare a nàrrere sa nostra.
Nos paret chi, tenende contu de sa pronùntzia (ca sa gente narat “s’arremada”, non “sa remada”), sa paràula si potzat cullegare a su verbu arrimare. Pro custu verbu, Pedru Casu in su vocabulàriu dat custa definitzione: “arrimare tr. appoggiare. rifl. Arrimaresi appoggiarsi, addossarsi. Anche al fig. Arrimaresi a una familia cercar rifugio, appoggio presso una famiglia. Fermarsi”.
Duncas forsis “arremada” benit pròpiu dae su movimentu chi faghet su cumponidori arrimende (‘appoggiando’) s’ischina a su caddu, chi est su momentu chi decretat sa fine de sa cursa.
In sa fotografia, s’arremada de Ignazio Lombardi in una fotografia de Michele Vacca.
(GF.P.)
