Busache est connota dae tempus meda pro sa bellesa de sos costùmene e pro s’arte de su ricamu e de su tessìngiu de su linu, custu ùrtimu mancari semper prus pagu praticadu comente sa coltivatzione de su linu etotu. In custa bidda de su Barigadu, ancora a dies de oe, paritzas fèminas bestint ogni die de sa vida issoro su costùmene. Cussa de su ricamu est un’atividade ancora praticada siat pro sas camisas e antarella de sos bestires traditzionales e siat pro sa biancheria de sa domo.
Sos ricamos in sa tela de linu sunt fatos a puntu antigu (a contu), filet sardu e filet sitzilianu, ispighitas diferentes, intàlliu, punto croce, puntu Assisi e àteros.
Bortas meda sos disignos chi si ricamaiant e chi si ricamant sunt semper sos matessi. Pro nàrrere, cun su puntu antigu, si ricamaiant istellas diferentes, su pistocu de gàncios e su pistocu de bator antas (a rombos); siat in sas camisas de su costùmene de sas fèminas siat in sos ricamos de su corredo.
In filet sardu e in cussu sitzilianu si ricamaiant de prus frores (su prus rosas) o fruta (sa fògia de sa bide e s’àghina).
A intàlliu si ricamaiant s’ispiga de su trigu e frores de calidades diferentes chi podiant tènnere sa minestra de isprones, su trapadillu froridu e àteros meda comente fundu de su ricamu.
Su costùmene traditzionale ddu ricamaiant tenende in contu sa cunditzione sotziale e s'edade de chie si ddu depiat pònnere e sas ocasiones: unu fiat su costùmene fitianu chi fiat diferente dae cussu de sa festa, un’àteru fiat cussu pro andare a crèsia sa de tres domìnigas de su mese, un’àteru diferente fiat cussu de dolu chi si poniat pro unu parente non de acanta e diferentes fiant cussos pro sas missiones de fàghere in presse e pro sas àtera missiones, pro visitas a domos angenas, pro s’isposa chi andaiat a Comune pro sas cartas de sa coja, pro sos batijares, pro ''su presente''1. Fintzas sa camisa de su costùmene de sos òmines est ricamada.
Cun su linu coltivadu in su sartu de Busache e tèssidu in domo si faghiant:
- sas antarellas ricamadas a filet, o fintzas cun istrìscias fatas a s’uncineto, chi si poniat pro ''su presente'', pro sas visitas de garbu a sas domos e pro sos ballos;
- sas mànigas de sa camisa chi sas fèminas si poniant pro ''su presente'' e pro sas visitas de garbu a sas domos;
- sa parte in bassu de sa camisa de sas fèminas chi est longa e ammuntat sas cambas (''coas'');
- pro sos òmines: sas camisas de fitianu e sos cartzones.
In sa crèsia iscunsacrada de Santu Domìnigu, chi est de su de XVI sèculos e ddi narant Cunventu, b’est su Museu de su Costùmene traditzionale de Busache e de su linu Su museu tenet duas setziones: una dedicada a sos costùmenes e s'àtera a comente si coltivaiat e traballaiat su linu. Paris cun sas ainas de traballu est postu in mustra unu muntone de roba antiga tèssida e ricamada, de tela de cotone e de linu: camisas, palas in brocadu, sos costùmenes de sos pitzinneddos e cussos de sos pitzocheddos, sa roba de fitianu e cussa de sas dies de festa, biancheria.
1 Su Presente fiat cando sas fèminas nche leaiant su pane e sos durches a domo de sos isposos.
(MM – informatziones dae su situ istitutzionale de su Comune de Busache)
