S’arte de su tessìngiu est una traditzione antiga chi in sos sèculos at impignadu, ma fintzas apassionadu, sas fèminas de biddas meda de Sardigna; fèminas chi tessiant pro su bisòngiu de tènnere tiàgias, lentzolos, mantas e cale si siat cosa de roba chi abisongiaiat in domo. Sas pipias imparaiant dae piticas, in antis abbaidende sas fèminas mannas chi abarraiant oras e oras tessende e a pustis cumintzende dae su pannu lisu fintzas a imparare tècnicas e disegnos prus difìtziles e rafinados.
In duas biddas de sa Provìntzia de Aristanis, in Mòguru e in Samugheo, sas fèminas sighint a tèssere, su prus a manera traditzionale e cun su telàrgiu ‘orizontale’; de su tessìngiu nde ant fatu fintzas unu traballu pagadu, connotu e apretziadu meda, produint tapetes, bèrtulas e biancheria pro sa domo cun disegnos antigos ma fintzas modernos, a bortas imbentados dae artistas.
De Mòguru sunt apretziados meda sos aratzos de cotone, linu e laneta colorada tèssidos a bagas, a briali o a litzas e sos tapetes e sas fànugas cun disegnos a pibiones. Sas figuras podent èssere geomètricas o de vegetales: rosas, rosas de monte, cambos de bide e budrones de àghina; ma fintzas caddos, chervos, culumbas e figuras de balladores. Su tessìngiu de Mòguru est tìpicu pro sos colores e sos colores fortes.
Sa Fiera de su tapete de Mòguru cuncordada ogni annu in s’istiu e lòmpida a prus de 60 annos, est s’ocasione pro ammirare tapetes e aratzos de sa mègius traditzione moguresa.
In Samugheo su tessìngiu est su traballu de fèminas meda, fintzas riunidas in cooperativas; tessent cun sa tècnica a in dente, a pibiones, a tauledda e a pannu pranu. Cambos froridos, animales e disegnos geomètricos decorant tapetes, fànugas, tendas e medas àteros traballos.
Ogni istiu, in Samugheo si cuncordat Tessìngiu, una mustra mercadu cun sos mègius traballos de sas tessidoras de sa bidda. In Samugheo b’est su Museu ùnicu regionale de s’arte tèssile sarda (MURATS) in ue sunt postos in mustra unu muntone de traballos, de biddas diferentes de Sardigna, tèssidos dae su de XVIII sèculos a sa segunda metade de su de XX sèculos: mantas, lentzolos, ammontos de càssia, costùmenes, bèrtulas, telàrgios e àteras cosas meda. Bi sunt fintzas sas afaciadas, aratzos piticherreddeddos chi si poniant in sas ventanas pro sa protzessione de Corpus Domini, e chimbe tapinos de mortu de su 1700, chi sunt tapetes in ue si poniant sos mortos cando fiant in mesu de domo. In su MURATS si faghent atividades didàticas e si cuncordant mustras acapiadas a s’arte de su tessìngiu fintzas modernu.
(MM)
