Su Comitadu provintziale pro s’òrdine e sa seguresa pùblica s’est riunidu pro faeddare, intre àteras cosas, finas de sa Sartigliedda de istiu chi est in programma pro domìniga 14 de austu a sas 6 e mesa de sero (h 18,30) in sa marina de Turre Manna.
Sos traballos los at ghiados su prefetu Stelo, in presèntzia de sas Fortzas de s’Òrdine, de su cumandante de sos Vìgiles de su Fogu, de su sìndigu de Aristanis e de su presidente de sa Pro Loco.
In sa riunione ant presentadu sas lìnias generales de sa manifestatzione e ant bogadu a campu sos elementos de interessu in contu de seguresa preventiva e de servìtzios de òrdine pro garantire sa seguresa de chie totu partètzipat a s’eventu.
Si pensat chi b’at a andare unas 1500 persones e, bidu chi sa giostra la current in su “Spazio Ichnusa” chi est mannu meda e chi bi partètzipat bìndighi cavalieris ebbia, paret chi non b’apat dificultades mannas in contu de viabilidade istradale e de parchègios.
“S’obietivu est de dare sa possibilidade de partetzipare a sa festa in seguresa – narat su prefetu -finas pro custa manifestatzione importante, apretziada e isetada meda siat dae sos aristanesos siat dae sos turistas chi ant a pòdere bìere una rapresentatzione comente non si bidiat dae duos annos”.
(GF.P.)
