S’artzidiòtzesi de Aristanis intrat comente sòtziu sustenidore in sa Fundatzione Mont’e Prama, leende.nche in doda sos terrinos in ue sunt essidos a campu sos Gigantes. S’acordu firmadu eris est unu matoneddu nou pro fraigare unu sistema de gestione de sos benes culturales difùndidu pro sa valorizatzione culturale e turìstica finas de sas crèsias de Santu Giuanne de Sinis e de Santu Srabadori.
“Sa Crèsia arborense s’est chèrrida aunire a su traballu chi su sistema istitutzionale est mandende a in antis pro amparare su patrimòniu archeològicu e culturale de su Sinis” at naradu su presidente de sa Fundatzione Anthony Muroni “batende comente Fundu de dotatzione sos terrinos chi, dae su 1974 a oe, ant bogadu a campu su prus de sas isculturas monumentales de Mont’e Prama (màgines, modellos de nuraghe e bètiles)”.
“Fiat unu mapale ùnicu abarradu foras dae sa decraratzione de utilidade pùblica chi su Ministeru de sa Cultura at publicadu in su mese de santugaine 2021 riferidu a sos ùndighi ètaros de espropriare in cussa zona – at ispiegadu Muroni -.Cun su votu cuncordu de su Cda in contu de custa intrada noa e cun sa firma de oe, podimus nàrrere chi si serrat su chircu e si podet mòvere a cara a una fase noa”.
Cuntentu meda finas padre Roberto Carboni, s’archipìscamu metropolita de Aristanis: “Cando in su mese de martzu passadu amus pensadu de nos propònnere comente cumponentes noos de sa Fundatzione tenìamus craru su ruolu nostru de parte ativa de sa comunidade, chi amus semper cunfirmadu collaborende in sa mègius manera siat cun sa Subrintendèntzia a sos Benes archeològicos de Casteddu e de Aristanis siat cun su Comune de Crabas. Amus semper rinuntziadu a sos prèmios cando ant agatadu carchi cosa, ca semus cumbìnchidos chi sa crèschida culturale siat una parte importante de sa crèschida sotziale de su territòriu”.
“In s’acordu cun sa Fundatzione amus chèrridu inserire finas s’impignu pro sa valorizatzione culturale e turìstica, tenende contu de sas esigèntzias litùrgicas, de sas crèsias de Santu Giuanne e de Santu Srabadori – at agiuntu mussegnore Carboni -. A pònnere in parte un’ente chi at mustradu s’afidabilidade sua in custu primu annu e mesu de vida nos dat seguresa in contu de sos interventos de mantenidura chi serbint pro las amparare semper prus, in mesu de sas vìsitas e faghende.las connòschere semper a prus gente”.
At mustradu isperàntzia finas Nadia Canu, sa diretora de sa Fundatzione: “A tènnere disponibilidade de su mapale 1588 nos dat sa possibilidade de andare a passu prus lestru pro pedire de fàghere iscavos noos, in agiunta a sos chi sunt giai programmados dae sa Subrintendèntzia”.
“Tenimus dinari chi cheret impignadu intro de sa fine de s’annu 2022, in s’isetu de fàghere chircas in s’àtera parte de cussa àrea – at agiuntu Canu -. In su mese de santugaine de su 2021 su MiC at decretadu vìnculos in ùndighi ètaros, ma sas operatziones pro espropriare, chi sunt in càrrigu de su Comune, tenent tempos longos chi finas a como non nos ant dadu possibilidade de programmare sos interventos in fine”.
A custu propòsitu su presidente Anthony Muroni, tenende contu de sa netzessidade de impignare su dinari de su “Grande progetto Mont’e Prama” pro tancare su logu, pònnere infrastruturas e video sorvelliàntzia, in prus de sa parte destinada a sa musealizatzione prevìdida dae su cuncursu internatzionale de ideas chi at a iscadire in su mese de nadale, annùntziat initziativas cun su MiC e sa Regione Sardigna: “Apo dadu s’incàrrigu a s’Àrea tècnica de torrare a fàghere in detàlliu sas protzeduras chi ant permìtidu de cuntzèdere sos finantziamentos pro espropriare, cun sos tempos pro ispèndere su dinari, e sas chi ant decretadu s’utilidade pùblica de sos terrinos interessados. Tenimus bisòngiu de fàghere in presse e bene, sena rimandare ancora”.
(GF.P.)
