Su sìndigu de Aristanis Massimiliano Sanna, s’amministradore istraordinàriu de sa Provìntzia Massimo Torrente, s’assessore regionale a s’agricultura Gabriella Murgia e su vitze prefetu vicàriu Giuseppe Rania su 2 de santandria in su campusantu “Santu Pedru” de Aristanis ant onoradu s’ammentu de totu sos chi si sunt impignados in sas atividades amministrativas, autonomìsticas e democràticas. Una tzerimònia chi su Comune est dedichende finas a chie cun mèritu, pro more de s’impignu intelletuale e de su traballu, at dadu onore a sa comunidade, a sa tzitade e a s’istitutzione munitzipale. In sa tzerimònia bi fiant sas autoridades tzitadinas prus artas.
“Comente sos chi sunt bènnidos in antis nostru, nois puru cherimus manifestare s’istima de sa comunidade pro chie, cun amore pro sa tzitade, s’est distintu dende.li onore e megiorende.la: fèminas e òmines chi si sunt impignados in sas istitutziones, in sas professiones e in su traballu (pùblicu e privadu) ponende.si a disponimentu de s’Istadu e de s’Amministratzione comunale, ghiende.la o faghende.nde parte, cun ispìritu de servìtziu – at naradu su sìndigu Sanna -. S’insigna chi tenimus a in antis ponet paris totu custu. Un’ammentu ispetziale lu chèrgio fàghere pro s’ingegneri Salvatore Annis e pro su dotore Giovanni Canalis, sìndigos famados e mai ismentigados chi ocannu faghent anniversàriu de sa morte: pro su primu sos 40 annos, pro su segundu sos 60. In su 2022, de su restu, diat àere cumpridu 90 annos finas dotore Sandro Ladu. Nd’ammentamus sos mèritos ammentende s’atividade professionale, polìtica e sotziale sua”.
“Tocat a ammìtere – at sighidu su sìndigu Sanna – chi bortas meda sas situatziones e sos documentos ammentant sas fèminas lassende a banda s’operosidade issoro. Pro custa resone est còmpitu meu de mentovare a Ernestina Littarru, nàschida in su 1892, e a Ezzelina Cadeddu, morta trinta annos a como: ambas duas ant fatu meda e ant promòvidu meda pro sa crèschida sotziale, sa maternidade, sa promotzione e s’autodeterminatzione de sas fèminas. A s’ammentu de custas figuras si b’aunit cussu de àteras fèminas animosas, fortes e chi sunt istadas in Cussìgiu comunale: Rosina Leo, Pina Brizzi e, ùrtima ma prima, su sìndigu Angela Nonnis.
Est normale a àere ismentigadu a calicunu, e mi nd’iscuso. Ma custa targa e sa corona chi l’at a imbellire mustrant su disìgiu de non lassare a banda a niunu, ispetantis de finire de perfetzionare sa toponomàstica dende a sas fèminas e a sos òmines - chi ant agiuadu a iscrìere s’istòria e sa tziviltade de Aristanis – unu reconnoschimentu beru, adatu e chi duret in su tempus”.
(GF.P.)
