Sas mòngias frantziscanas missionàrias de Assisi si nche sunt andadas dae Aristanis giai dae carchi die. In sos meses chi benint (forsis intre abrile e maju 2023) sos locales de carrera Santu Saturninu in su tzentru istòricu s’ant a trasformare in un’istrutura sòtziu assistentziale destinada a betzos chi non sunt autònomos, fornida finas de unu tzentru diurnu, e l’at a gestire sa cooperativa Kcs Caregiver. Imbetzes s’asilu Boy, s’iscola paritària pro s’infàntzia chi dae su 2016 est amministrada dae sa cooperativa Dire Fare Giocare, no at a serrare.
“Non bi la pitzigamus prus a mantènnere s’istrutura – ispiegat suor Rosària Pizzo, superiora delegada dae sa madre generale pro s’Itàlia de sas mòngias frantziscanas missionàrias de Assisi -. In custu momentu in Aristanis nch’abarrat una mòngia ebbia, pro resones familiares. A dolu mannu non faghet prus a dare continuidade a sa presèntzia nostra in tzitade. Pagu prus de deghe annos a como inoghe sas mòngias frantziscanas fiant 12, in sos ùrtimos tempos, imbetzes, nche nd’aiat abarradu duas ebbia”.
In su mundu sas mòngias missionàrias frantziscanas sunt 560 pagu prus o mancu, e de custas una norantina sunt divididas intre sas 6 comunidades italianas chi sunt ancora operativas. S’edade mèdia de sas mòngias est arta meda, però.
“A serrare una comunidade est semper unu dispraghere – sighit suor Rosària Pizzo – ma s’asilu Boy non s’at a firmare. In s’iscola nostra nch’at passadu deghinas e deghinas de generatziones. Sa cooperativa Dire Fare Giocare at a sighire a s’ocupare de s’iscola, comente faghet giai dae paritzos annos”.
S’asilu Boy, nàschidu comente tzentru pro acòllere sas pitzinnas òrfanas, fiat nàschidu in su 1901 dae s’idea de Vincenzo Boy e Vincenzina Carta, maridu e mugere. A lu dirìgere, pro prus de chimbanta annos, est istada sa fìgia de sos fundadores, suor Maria Vincenzina Boy Carta. Sa comunidade de sas mòngias frantziscanas missionàrias de Assisi l’at amministradu dae sa metade de su sèculu passadu.
Sos locales abarrant in propiedade de sas mòngias, chi los ant allogados a sas cooperativas. “Pro cantu atenet a s’istrutura sòtziu assistentziale chi at a abèrrere in su 2023 – finit suor Rosària Pizzo – su locale tenet bisòngiu de carchi megioru. Semus dialoghende pro chi sas duas cooperativas potzant traballare e collaborare paris”.
(GF.P.)
