B’at partetzipadu un’impresa ebbia (e mancu sarda) a s’apaltu de 12 milliones pro s’afidamentu de su servìtziu de gestione, megioru energèticu, agiornamentu normativu, manutentzione ordinària e istraordinària de sa fornidura de energia elètrica de sos impiantos de illuminatzione pùblica e de sos semàforos de Aristanis, unu traballu de fàghere in 15 annos.
Sa cummissione, coordinada dae su dirigente de s’ufìtziu tècnicu Alberto Soddu at giai istudiadu s’oferta tècnica e in sas dies chi benint at a abèrrere sa busta cun s’oferta econòmica.
“Podimus nàrrere ebbia chi a su bandu, chi iscadiat su 6 de santugaine de s’annu coladu, b’at partetzipadu una sotziedade ebbia, chi tenet sede in continente – ispiegat Ivano Cuccu, assessore a s’Urbanìstica e Viabilidade -. Su cuadru econòmicu est de 12 milliones e 12.207 èuros pro 15 annos, est a nàrrere 800.818 èuros a s’annu”.
“Est craru chi s’apaltu est importante meda pròpiu pro su valore econòmicu, punnat a megiorare sa calidade de su servìtziu e a minimare sos consumos, màssimu in custu momentu marcadu dae una crisi energètica manna – sighit Cuccu -. Pro s’illuminatzione pùblica amus a tènnere unu modernamentu de sos impiantos cun s’impreu de sa tecnologia a Led, cambiende prus de 5mìgia puntos de lughe e lampiones de semàforu. Cun s’apaltu nou s’at a pòdere fàghere finas su tele controllu de sos cuadros elètricos, fàghere passàgios pedonales illuminados e pònnere semàforos de ùrtima generatzione, chi sunt de importu mannu pro sa seguresa de sas istradas e pro sarvare sa gente e sos automobilistas”.
“Chèrgio ammentare chi sos impiantos de semàforos, oe, nche finint a sa sola prus de 230mìgia chilowattora a s’annu, una parte manna de su totale de sa bulleta energètica chi serbit pro s’illuminatzione pùblica. Modernende sa retza semafòrica – finit Ivano Cuccu – s’at a minimare su consumu de su 90%. Si previdet de impreare in un’annu 20.800 kWh. Su megioru de sos impiantos at a megiorare finas sa calidade e sa produtividade de su servìtziu”.
Alberto Soddu, dirigente de sa Scae de Milanu (sa sotziedade betza chi amministrat sos impiantos semafòricos), at aprontadu una detèrmina pro sighire su servìtziu de mantenidura de sos impiantos pro una summa de prus de 5mìgia èuros finas a comintzare s’apaltu nou. Su provedimentu fiat pretzisu pro non firmare sa manutentzione ca sa summa a disponimentu, essende iscadidu s’apaltu, fiat finida.
(GF.P.)
