Confcommercio de Aristanis organizat pro oe, giòbia 28 de trìulas 2022 a sas 3 e mesa (h 15,30) in sa sede sua in carrera Sebastiano Mele n° 7G in Aristanis, unu seminàriu pro faeddare de sos agiudos a sas impresas de su cummèrtziu e de sa distributzione mentovadas in sa Lege Regionale n° 3 de su 9 de martzu 2022 “Dispositziones atuativas pro cuntzèdere contributos in contu interessos e in contu capitale pro sas operatziones de crèditu agevoladu a sas atividades cummertziales”.
Cun su seminàriu, s’Assòtziu cheret informare sas atividades de su territòriu chi, pro progetos de investimentu, b’est sa possibilidade de impreare sos contributos chi sighint:
- Contributos “a fondo perduto” de su 40%.
- Contributos in contu interessos.
- Contributos in contu capitale pro chie cheret investire in personale.
- Paga de su 50% de su costu de sas garantzias dadas dae sos Cunsòrtzios de sos Fidos.
Su seminàriu intrat in su setore de sos servìtzios de informatzione fatos dae s’Assòtziu e pro partetzipare non si pagat nudda.
Sunt risorsas importantes postas a cùrrere cun sa finantziària de su 9 de martzu chi disponet de 29 milliones de èuros pro sustènnere sas impresas piticas e piticas meda de su cummèrtziu e de sa distributzione (tzilleris e ristorantes).
Pro informatziones si podet telefonare a su nùmeru 0783-73287 o abbaidare in su situ internet www.confcommerciodioristano.it.
(GF.P.)