Acabbu de s’emergèntzia “ dotoris de famìllia” in s’àmbitu territoriali 1.3, chi pertocat is comunus de Aristanis, Prammas e Santa Justa. Gràtzias a s’arribu de dotoris nous, totu is tzitadinus chi sunt residentis me in is tres comunus, ant a podi sceberai unu dotori de famìllia.
E duncas a movi de sàbudu 22 de làmpadas s’ambulatòriu straordinàriu de continuidadi territoriali de Aristanis ( chi fiat in sa bia de Carducci 35 e iat abertu po donai assistèntzia a is impitadoris chi fuant abarraus sena dotori), no at a funtzionai prus. S’urtima dii de abertura est stètia cenàbura su 21 de su mesi de làmpadas.
Sa Asl 5 de Aristanis cumbidat is tzitadinus chi non tenint su dotori, a ddu sceberai a su sportellu andendi anca est s’ufìtziu “sceberu e rèvoca de su dotori”, de su distretu sanitàriu de Aristanis (in sa bia de Carducci, 41), chi aberrit de su lunis a sa giòbia, de is otu a mesudì e mesu. Si podit fai finas in lìnia, de su giassu:https://www.sardegnasalute.it/sceltamedico/
