Est imbàtidu s’okay definitivu pro sa manifestatzione aprontada dae Confcommercio e dae su Comune de Aristanis – cun sas butegas abertas finas a tardu in sos martis sero de istiu – chi finas a como non fiat seguru ca non b’aiat adesione dae sos butegheris.
Sa manifestatzione at comintzare martis 19 de trìulas e at a sighire pro totu su mese de austu, comente at annuntziadu su presidente de Confcommercio Nando Faedda: “Finas a como sas atividades chi ant dadu adesione sunt una chimbantina, ma bi nde podet aderire ancora” ispiegat “ca de seguru prus bi nd’at, mègius est”.
Su presidente de Confcommercio a s’incomintzu fiat unu pagu apessamentadu pro sas votatziones: “Semus mòvidos in ritardu, però nos semus postos in passu”, at naradu ammentende s’impignu chi bi cheret a organizare una manifestatzione de custu tipu. “In antis de su 19 non dìamus àere pòdidu comintzare, tocat a preparare totu e no est una cosa fàtzile”.
Paris cun sas atividades abertas finas a mesanote b’at a àere eventos de ispàssiu pro pitzinnos, grupos folk e prestigiadores de istrada. Sos ispetàculos musicales ant a èssere a cura de sas butegas e, comente onni annu, in sas carreras in ue b’at butegas aderentes non bi podet colare veturas (foras de carrera Mazzini).
(GF.P.)