Eris 25 de santugaine 2022 in Aristanis su caldu est imbàtidu a 30° (e prus). Dae su chi narat Sardegna Clima, su termòmetru est imbàtidu a 30,3° in sas istatziones de Sa Rodia e Bàini (Villaverde), a 30,2° in Asune e 30,1° in Samugheo e in sas campagnas de Aristanis.
Duncas su calore mannu non lassat nen sa Sardigna nen s’Itàlia e s’istiu at a sighire finas a coa de chida: chie cheret podet andare a mare finas in sas dies de sos Mortos.
Pro sa prima borta in s’istòria sunt faeddende de novembrata: su situ ilmeteo.it/ narat chi at a bènnere unu anticiclone africanu (li narant Halloween) chi at a batire istabilidade atmosfèrica, tempus bonu e caldu.
Custa previsione la cunfirmat finas su Tzentru Meteorològicu Europeu (ECMWF), chi narat chi custu anticiclone at a interessare non s’Itàlia ebbia ma belle totu s’Europa. In Val Padana e Toscana, però, sa nèula at a èssere meda.
Forsis, dae su chi narat ilmeteo.it/, nd’amus a essire a pustis de sas primas deghe dies de santandria, cun temperaduras minimadas, mancari pagu.
(GF.P.)