S’istiu rock de Aristanis sighit cun sos apuntamentos de sa Contea. Sa de 11 editziones de sa gara musicale fata paris cun su Comune de Aristanis at ospitadu sa segunda serada cun sos A-Regeneration, progetu de s’aristanesu Gianluca “Tobi” Contini e de sos Teddy Daniels de Casteddu, e custu sàbadu at a ospitare a sos Endura tataresos chi ant a fàghere ascurtare sas tratas de s’album nou “Between Earth and Sky” essidu in freàrgiu e disponìbile in sas prataformas musicales printzipales.
Sàbadu 23 de trìulas dae Tàtari benint sos Reatzione, balentes meda, chi in su 2019 ant fatu s’album “Sopravvissuti” e ant a antetzipare carchi cosa de s’album nou, e Johnny Revelator formatzione noa cun tantos branos chi ancora non sunt essidos.
A fine de trìulas ant a sonare sos Black Code, grupu heavy metal aristanesu primu classificadu in su 2018, e sos Imprimatur cun su EP issoro “Errare/Perseverare” chi est disponìbile in sos mègius sitos musicales.
E finas sa formatzione trash metal bonarcadesa The Wrestlers (sorpresa de s’editzione 2019), sos Thee Kares (grupu punk rock’n roll), sos casteddajos Smokey Gunner e tantos àteros agiornamentos in su situ nou conteaoristano.it.
In mesu de sas novas de su 2022 b’est finas sa collaboratzione de s’assòtziu a sa realizatzione de progetos ùtiles pro sa comunidade: bator de sos chi retzint rèdditu de tzitadinàntzia pro 24 meses ant a agiuare a ACR Contea in s’organizatzione e in sa gestione de sos eventos.
(GF.P.)
