Bastat de bi clicare, de nche pònnere sos datos bancàrios e su giogu est fatu: su dinari isparit dae su contu. Finas in Aristanis su Bancu de Sardigna at retzidu unu muntone de signalatziones in contu de sos sms farsos, chi paret chi bèngiant dae su matessi nùmeru impreadu dae su grupu Bper pro sas comunicatziones ufitziales.
Su messàgiu, a s’aparèntzia, est totunu a una comunicatzione normale de sa banca e signalat unu prelievu irregulare o una intrada a su contu fata dae unu dispositivu localizadu in Lugano – o àteru logu foras dae Sardigna o dae Itàlia – o signalat su perìgulu chi s’aplicatzione de su contu siat cullegada a un’àteru telefoneddu. In fundu b’at unu link in ue intrare pro blocare sos abusos.
Si unu no istat atentu e clicat in custu link (chi de seguru no est su de sa banca) intrat in una pàgina web – totuna a sa de sa banca – in ue pedint sos datos suos e de su contu currente. Chie cumpilat cussa setziones est dende sos datos suos in manu de sos trufadores, chi dae cussu momentu ant a pòdere impreare sa carta sua.
Finas Adiconsum Sardigna, pro parare fronte a sas signalatziones, at aprofundadu su tema de sas trampas bancàrias fatas cun sms, faghende unu vademecum chi permitit de las riconnòschere e de si nde difèndere.
Comente ispiegat s’assòtziu, tocat a non si fidare de e-mail e messàgios chi pedint datos riservados (comente nùmeru de sa carta e intradas a sa home banking) bidu chi sos istitutos bancàrios non mandant mai comunicatziones de custu tipu.
Est importante finas a istare atentos a comente est s’sms, difatis mancari bèngiat dae su matessi nùmeru impreadu dae sa banca, si bi podent bìere diferèntzias in cunfrontu de sas àteras comunicatziones: a su sòlitu non sunt personalizadas, creant allarme e pedint datos riservados pro parare fronte a prelievos e intradas chi non sunt autorizadas.
A ùrtimu, pro seguresa est mègius a non clicare mai in perunu link retzidu in custa manera, ne iscarrigare sos allegados imbàtidos cun WhatsApp o cun messàgiu de posta eletrònica.
(GF.P.)
