Reconnoschimentu a 5 isteddos pro solididade e seriedade. Est su chi at retzidu sa Banca de Crèditu Cooperativu de Arborea dae s’anàlisi de Altroconsumo Investi, s’assòtziu de consumadores chi faghet inchiestas, produit materiale informativu e agiuat sos iscritos cun atziones de tutela.
S’istitutu de crèditu capitanadu dae Luciano Sgarbossa at tentu 585,24 puntos e su de bator postos intre sas 252 bancas esaminadas.
Sa Banca de Arborea est sa prima banca pro solididade e seriedade in riferimentu a totu sas bancas de crèditu cooperativu de Itàlia. Est de sas primas finas intre sas “bancas traditzionales”, in ue benit a pustis ebbia de s’Istitutu pro su Crèditu Isportivu, sa Banca Sviluppo e sa Banca Aidexa.
Su presidente Luciano Sgarbossa est cuntentu meda de su reconnoschimentu e at annuntziadu una novidade pro s’annu chi benit: ant a abèrrere una filiale noa, chi at a dare àteros postos de traballu. Sa Banca de Crèditu Cooperativu de Arborea at a èssere presente finas in Seddori.
Custa filiale noa in Sud Sardigna s’at a agiùnghere a sos ufìtzios chi sunt presentes in sa sede tzentrale de Arborea e in sas filiales de Terraba, Santa Giusta, Donigala Fenughedu, Uras, Mògoro, Crabas e Gùspini.
“Custu resurtadu – at decraradu su presidente de sa Banca de Arborea Luciano Sgarbossa – pro nois est un’onore, pro su traballu chi amus fatu in baranta annos de vida de sa Banca. Tocat a ammentare in antis de totu sos sòtzios fundadores chi ant crèidu in cussa chi a cussu tempus si naraiat Cassa Rurale e Artigiana, e totu sos sòtzios chi sunt sighende a si fidare de nois, e sunt semper de prus”.
“Custu resurtadu importante– sighit su presidente Sgarbossa – de seguru benit dae su traballu fitianu de totu sos collaboradores nostros chi onni die cun professionalidade e impignu ponent in òpera sos programmas definidos dae su Cussìgiu de Amministratzione, chi tenet a diretore generale a Sandro Cigagna. E non sunt prus pagu importantes totu sos sugetos chi sunt de fundamentu pro sa BCC: su Cullègiu Sindacale, sa Capo grupu Iccrea, sa Federatzione de sas BCC Lazio, Ùmbria, Sardigna, Federcasse, sa Sotziedade de Revisione”.
(GF.P.)
