Nois lu naramus dae ora, chi sa limba sarda est unu "valore aggiunto" pro sa promotzione de sos produtos locales, ca los faghet diversos dae sos àteros e "immediatamente riconoscibili", comente si usat a nàrrere.
Su prus de sos sardos però tenet dificultade a l'impreare: sas aziendas in sas etichetas non solu impreant s'italianu ebbia ma a bortas istròpiant sos nùmenes de produtos tìpicos e nd'essint a pìgiu atzoroddos tipu "formaggelle, fregola, savoiardoni (!!!)".
Sas ditas chi imbetzes si nde sapint de màrketing e cherent "positzionare" unu produtu in su mercadu pro lu fàghere reconnòschere a su target de destinatzione in manera crara ischint chi tocat a li dare unu marcu nòdidu chi lu fatzat diversu dae totu sos àteros produtos chi si b'assimìgiant.
Est su chi at fatu Sammontana, chi a su geladu nou fatu cun "soru" sardu (ricotta sarda) l'at postu a nùmene "S'oru de Sardigna", forsis gioghende cun sos significados de "s'òru" (l'oro in campidanesu) e "soru" (ricotta in logudoresu).
Mai l'esserent fatu! Pro una vocale finale nd'at essidu unu pubusone mannu ("Non si dice ORU, si dice ORO! Ma perchè non si informano!") ca gente meda no l'ischit chi sa paràula in campidanesu esistit e duncas errore non bi nd'at.
Ma de su restu bi semus abituados, a su fatu chi cando b'at unu sàbiu chi mustrat sa luna, sos macos abbàidant su pòddighe. In custu casu, sa luna diat èssere chi una de sas aziendas italianas prus connotas, cun 370 milliones de faturadu, at chèrridu impreare sa limba de Sardigna pro fàghere a connòschere unu produtu fatu cun ingredientes sardos. Su pòddighe est a abarrare abbaidende a fissu a fissu cussa vocale ebbia.
(GF.P.)
