Sa bidda de Fordongianus est posta acanta de su frùmene Tirsu, in unu pranu de trachite colore de rosa, perda impreada dae semper pro fraigare sas domos chi dant un'aspetu gentile a sas carrera.
Fordongianus benit dae su nùmene latinu Forum Traiani, ca fiat una bidda de importu in època romana, cando fiat imperadore Traianu, e logu de cummèrtziu, de mercadu intre a sos chi biviant acanta de su mare de Aristanis e sos chi calaiant dae sos montes.
Fordongianus est connotas pro sos bagnos termales. Cussos antigos, mentovados fintzas dae Tolomeu, sunt de su I sèculu a pustis de Cristos; sos romanos connoschiant bene sas calidades curativas de custa abba callente chi nd’essit a prus de 50 grados. A dies de oe sas termas romanas sunt unu giassu archeològicu de importu e visitadu meda dae sos turistas; si podent ancora ammirare sa “natatio”, una bartza de forma retangulare in ue bi fiat s’abba callente naturale; unu cortze cun arcos e sa bòveda a bombè e cantos de panimentos fatos in mosàicu.
Fordongianus sighit a èssere connota e frecuentada pro sas termas; in un’istabilimentu modernu si podent fàghere curas termales pro curare maladias e pro curare sa bellesa de sa pedde e su corpus; a intro e in foras bi sunt piscinas pro passare in pàusu su tempus e reposare.
In una vìsita a custa bidda, in prus de andare a sas termas romanas e a su giassu archeològicu, si podent bìdere sa crèsia de Santu Lussùrgiu, in ue su 21 de austu de su 304 ant mortu a su Santu chi aiat seberadu sa fide cristiana; sa crèsia parrochiale dedicada a Santu Perdu, chi tenet sa fatzada elegante cun rosones e fileras de contones de trachite rosa; sa domo chi ddi narant aragonesa.
(MM)
